Azərbaycan Respublikası Xüsusi Olimpiya Komitəsinin cari ilin 23 sentyabr tarixində Bakı İdman Sarayının konfrans zalında “Birləşmiş idman və inklüziv gənc liderlik” layihəsi çərçivəsində metodiki təlim seminarı, daha sonra isə Sarayın arenasında mini-futbol yarışlarının final mərhələsi keçirilmişdir.

9 oktyabr 2021

 Layihə Amerika Birləşmiş  Ştatlarının Azərbaycan Respublikasındakı səfirliyinin “Grant”ı hesabına baş tutmuşdur.

Metodiki hissədə təlimçi Nicat  Mehralıyev iştirakçılara "Liderlik nədir və həqiqi lider necə olmalıdır?"  mövzusunda seminar aparmışdır. Seminarda liderlik barədə həm nəzəri biliklər aşılanmış, həm də simulyasiya oyunu  keçirilərək iştirakçıların xüsusi keyfiyyət və bacarıqları üzə çıxarılmışdır. Ümumilikdə,  seminar iştirakçıların böyük marağına səbəb olmuş, daha sonra təlimçi ona ünvanlanan sualları cavablandırmış, sonda isə xatirə şəkli çəkilmişdir.

Lənkəran və Salyan regional filiallarının hər birindən 4 qız komandası olmaqla, ümumilikdə 8 komandanın iştirak etdiyi mini-futbol yarışlarının final mərhələsi zamanı isə Salyan regional filialının 4-cü komandası yarışların qalibi olmuşdur.

Daha sonra isə 4 oktyabr tarixində Azərbaycan Respublikası Xüsusi Olimpiya Komitəsi ilə Beynəlxalq Xüsusi Olimpiya Komitəsi arasında “Birləşmiş idman və inklüziv gənc liderlik” layihəsi çərçivəsində vebinar baş tutmuşdur.

Qeyd edək ki, hər birində 10 idmançı (5 atlet, 5 partnyor) olmaqla 8 qız komandası, ümumilikdə 80 idmançı layihəyə cəlb olunmuşdur.